வீடுகள் தோறும் வாசல் படி

          

திட்டமிட்ட காரியங்கள் நிறைவேறும் 
கட்டளைகள் யாவும் கரையேறும்
காட்சிப்  பிழையானால்  கண்கள்குளமாகும்
சாட்சிகள் நேரென்றால் நிம்மதி  நிலையாகும்

சூழ்ச்சிகள் தொடர்ந்தால் சூழும் சோதனைகள்
சொந்தம் பந்தம் யாவர்க்கும் வேதனைகள்  
வாட்டமுறவே வரும் பெரும் வலிகள்
கூட்டமாகவே கொல்லும் சிறுநரிகள்

விட்டகலும் வேதனைகள் பட்டகளை தீரும்
என்றேமகிழ இரும்பை கவரும் காந்தம்- போல்
மீண்டும் வளைய வரும் மெல்லவே 
கொல்ல வரும் பொல்லாத விதியும்

தொட்டுவிட முடியாத தூரம் பருந்து 
வட்டமிட்டு வேண்டுவதோர் விருந்து  
காற்றும் மழையும் இங்கு காவலா-விதி
கூட்டிச் செல்லும் பெரும் ஆவலா

தேடும் வாழ்வு கிடைத்திடுமா தெய்வ 
வாக்கு பலித்திடுமா வாழ்வில் -இல்லை
இட்டமுடன் எழுதிவிட்ட பரமனவன்
பட்டைகளை போட்டிடுவான் முடிவிலவன்

ஒற்றுமையில் வேற்றுமை காணும் உலகு
நேற்றும் இன்றும் ஒன்றாய் இல்லை விலகு
வீடுகள் தோறும் வாசல் படி - விதி 
வந்து வந்து போகும் நேசப்படி

காலம் முழுதும் கவலைகள்  தின்னும்
காற்றுப் போனால் மண் உடலை தின்னும்
திட்டிடவும் முடியாது தட்டிடவும் தெரியாது
நாளும் முட்டியே மோதி புத்திபேதலிக்கும்

விட்டவழி என்றெண்ணி வாழ்ந்திடுவோம்
சட்டி சுட்டது என்றெண்ணி வீழ்ந்திடுவோம்
தேட்டமும் திரவியமும் தீண்டாது - என்றும்
தெவிட்டாத பேரின்பம் வழங்காது

நாட்டமுறும் நிகழ்சிகளும் நல்காதே
நன்றி கெட்ட மாந்தர்களும் உள்ளாரே
பச்சிளம் குழந்தை என்றும் பார்க்காதே
பாவங்கள் என்றெண்ணி இரங்காதே

பட்டாம் பூச்சிகள் போல்  பறக்காதே 
பற்று பாசம் என்னவென்று புரியாதே 
காட்டிலும் நாட்டிலும் இது நிலையாமே-இவை 
கண்டு கண்டு நொந்தாலும் விதியில்லையே