இணையத் தமிழே இனி

  

சித்திரை வருடப் பிறப்பினை ஒட்டி எழுத்துப் படைப்புக்கள் திரு ரூபன், திரு. யாழ் பாவணன் அவர்கள் நடாத்திய கவிதைப் போட்டிக்காக எழுதிய வெண்பாக்கள்.

முல்லைச் சிரிப்பொன்று மொட்டவிழ்க்கும் காலத்தில்

கல்லைக் களர்நிலத்தைக் காவியமாய்ச் - சொல்லின்

நனைமழையில் நாவுற்ற நற்கருத்தே ஆள்க

இணையத் தமிழே இனி

நிலாபார்த் திருந்த நெடுமுற்றம் மண்ணில்

உலாப்போகும் எந்தமிழ் ஊற்றில் - பலாவாய்

இணைகின்ற தேன்நீயே இன்புற்று வாழ

இணையத் தமிழே இனி

மண்ணில் சிறகே மகிழ்ந்தெங்கள் வாழ்வான

அன்னைத் தமிழே அருமருந்தே - வண்ணக்

கனவுண்டு நீவாழும் சங்கப் பலகை

இணையத் தமிழே இனி

வேர்நீயே தந்த விதை நெல்லைக் கொண்டிந்தப்

பாராண்ட நெஞ்சங்கள் பாரட்ட - சீராய்

மணக்க வருகயாம் மாண்புற்று வாழ

இணையத் தமிழே இனி

தென்றல் கரும்பெல்லாம் தேடக் கிடைத்தாலும்

உன்றன் சுவைக்கெதுவும் ஒப்பாமோ? - குன்றா

நினைவுச் சுவையேநீ நீடித்து வாழ

இணையத் தமிழே இனி

கலைவளர நீநின்ற தக்காலம் இன்றே

வலைவளர வேண்டும் வருக - தலையே

உனையென்று கொண்டோம் உயிர்நின்று வாழ

இணையத் தமிழே இனி

கொல்லத் துடிக்கின்ற கோழைகளின் கைசிக்கி

மெல்ல உனதாற்றல் மங்குவதோ? - சொல்லின்

இணையில் பெருஞ்சிறப்பே உன் இல்லம் இந்த

இணையத் தமிழே இனி

வெள்ளம் வருமுன் அணைகட்டும் நேரமிது

எள்ளிநகை யாடுவர்யார் எந்தமிழை? - துள்ளும்

கணைகொண்டு எப்பகையும் துண்டாடும் கையாய்

இணையத் தமிழே இனி