சாயி சரணம் சாயியே சரணம்

சாயி சரணம்  சாயியே சரணம்
வரணும் வரணும் பேரருள் தரணும்
சாயி சரணம்  சாயியே சரணம்
வரணும் வரணும் பேரருள் தரணும்

சிர்டியில் வந்துதித்த ஸ்ரீமானே - இந்த
சிருஷ்டியை காக்க வந்த பெருமானே
உம்கிருபையில் வாழ்கின்ற உயிர்தானே
உமைப்போற்றி பணிந்திடுவேன் தினம்நானே

வரும் நாளிலும் எந்தன் துணை நீயே
வரும் துயர்களை எல்லாம் களைவாயே
எடுத்த கருமங்கள் ஜெயம் பெறவே
கொடுப்பாயே எமக்கு  ஒரு வரமே 

மஞ்சள் நிறமாலை அணிந்திடுவேன்- உமக்கு
மங்கள வாழ்வு அளிப்பாயே
கொஞ்சும் தேன்தமிழில் உரைப்பேனே
உம்புகழ் தனையே இவ்வுலகினிற்கு

விந்தைகள் புரியும் வல்லவனே- இந்த
வையம் முழுவதும் உம் வசமே
சிந்தை தெளியவைக்கும் சீராளன் - நீ
சேர்ப்பாய் நலம்மனைத்தும் கூறாமல்

திருவிளக்குதனை  ஏற்றி வைக்க -அணையா
தொளிரு மெங்கள் குலவிளக்கு
நினைபோற்றி பாடிடவே எமை  
என்றும் புகழும் இந்த பூவுலகு

நாடியுமை  நின்றால் சாயி
ஓடிவிடும் நமை சூழும் கேடு   
கூடியுமை  தொழுதால் என்றும்
கோடி நன்மைகள்  தேடி வரும்    

மருவி யுமை  நின்றால் சாயி-  நின்
அருள் அருவி எனப்பாயும் - நின்
பெருமை தனை பேசிடவே 
பெரும் பேறுகளும் கூடும்

நற்கவிகள் நல்கிடுமே சாயி
நாமணக்க உமை பாடிமகிழ்ந்திடவே - என்
நாவினில் வந்தமரும் சாயி - எடுப்பாய்
நல்லெதுகையும் மோனையும் பெற்றிடவே

கற்பனை மிகவே கைப்பொருள்
வேண்டும் காருண்யனே-நயம்பெறவே  
நின் பொற்பதங்கள் தனை
புகழ்ந்து பாடிடவே
.
பீடும் பிணியும் விலகிடுமே
சாயி  நாமம் என்றும் நவின்றிடவே
நாடும் வீடும் நலம் பெறுமே
கூடும் என்றும் கோடி நன்மையுமே